_____
شعر: سلوى العينى
_____
وقتِك خلاص عدي وفات
مش باقي منك غير رفات
حبة قصايد ممسوخين
عن حلم مقتول من سنين
بتحاولي دايماً في الخيال
تبني قصورك من محال
حتي خيوطك دبلانين
وحروف مشاعرك مرجوفين
متشتته بين فين وفين
فامتسرقيش حبة خيال
المسرحية بدون كلام
والقلب صامت من سنين
علي باب مشاعرك بخت مال
والحظ حالف 100 يمين
والطلقه في قلبك تبات
ماتخلي حتي الشوق يلين
ورغم دا واقفه بثبات
والمسرح فيه متفرجين
ساحة الميدان للإعتصام
سريه تامه في الخصام
والضحكه مرسومه بنظام
ومشغلينها بوندوزين
حطي الفلاشه للكلام
وامشي بسعاده وإحترام
هو القانون دا جزء كام ؟
علشان محاكمتنا بإجاده
لمي جروحك م الطريق
واياك تبوحي بأي شيء
مفروض عليكي الإنسجام
والضحكة مصنوعه تمام
وف الليل علي طرف المخده
لو حابه تبكي دمعتين
النار لغيرك تكوي مين ؟
