_______
بقلم: د لحظة حسن
________
بدون شك كلنا بنحب اولادنا لكن أحيانا بنجرحهم بدون قصد٠ يجيلنا ضيف نقوله تعالى سلم على عمو لو أتأخر دقيقتين نقول أصله طالع براوى ٠
ولو روحنا مدرسته أول كلمة لمدرسه أصله شقى ومابيسمعش الكلام ومهمل فى دروسه بنقول الكلمه وننسى إنها أدام زمايله
وعلى السفرة لازم يتقاله كـُل كويس أنت خاسس وقربت تختفى
بنقول كل ده وإحنا بنضحك ومش فى دماغنا أى حاجه لكن رمينا سهام فى شخصية الطفل بدون ما ندرى
خلاص بقى عادى عنده انه يكون براوى لإن محدش سأله مجتش سلمت بسرعة ليه مش يمكن يكون بيهندم هدومه قبل ما يدخل على الضيف
حتى إهماله فى دراسته بقى شئ عادى إنه يتقال عليه بالتالى مش فارق معاه إنه يتفوق
الكلام ده بيصيب الطفل بالبلادة وعدم المبالاه بيقول فى نفسه مهما عملت حينتقدونى يبقي أتعب نفسي ليه
لازم نتعلم إن فترة الطفولة هى أكتر الفترات حساسية ودورنا إننا نبنى شخصية الطفل بطريقه سليمه ومتزنة
حديكم مثال
ديما لازم نشكر فى تصرفاته يعنى لو رسم رسمة فى كراسة مهما كان شكلها نقوله جميلة جدا إنت فنان
كده يبقي غرزنا فيه روح الابداع
ولو إتكلم مع ضيف عندنا أو أى أحد من قرايبنا نقوله على فكرة انت كنت مؤدب وبتعرف تتكلم مع الناس وأنا فخورة بيك ٠
ده حيخليه واثق فى نفسه ويبعد عن التعتعة فى الكلام ويزيل الخجل والكسوف
لازم ديما نشكر ونقيم اطفالنا تقييم جميل ونقوله لازم تبقي زى ما وصفتك للناس فى البيت كمان انا ببنى شخصية حقيقية مش مزيفه بجد قد إيه الكلام ده حيفرق مع أولادنا ولما يتعدى مرحلة الطفولة ويدخل فى المراهقة لازم نصاحبه ونبعد تماما عن العصبية معاه لأنها أخطر وأصعب مرحلة
ديما نقوله إحنا بنثق فيك ونراقبه من بعيد بدون ما نحسسه إننا بنراقب تصرفاته
نعلمه إن ربنا رقيب عليه وإنه مكلف فى السن ده ونغرس فيه المبادئ السليمة
والبنات فى المرحلة ليهم أسلوب خاص فى التعامل لأنها فترة تغير هرمونات وتقلبات جسدية ونفسية كبيرة أنتِ كأم لازم تكونى الصديقة وتنزلى لطريقة تفكيرها ولعبها وتبقي كمان صاحبة لأصحابها عشان تعرفى طريقة تفكيرهم وتعاملهم مع بنتك وتقيمى بنفسك مين ممكن تبقي صاحبة ومين تبعديها بنفسك عنها
أولادنا أغلى ما فى الحياة لازم تلعبوا معاهم وتحكوا وتتكلموا لازم ابنى يبقى صديقى يجرى عليا ويقولى يومه كان شكله إيه وأبعد عن التأنيب المستمر والتسفيه من رأيه وكلامه عايزة اقولكم إنى أنا شخصيا جنيت اجمل محصول لما أولادى كبروا لأنهم بدلونى الحب بالحب والتفاهم بالتفاهم والإحترام بالإحترام ٠
