____
د . لحظة حسن
_____
من فترة كدة بعيدة شوية يعنى نقول ٢٥ سنة ظهرت فى مصر موضة عدم الكلام بالعربي ولازم ندخل فى كلامنا كام كلمة كده انجليزى عشان الحديث يبقى شيك وأنيق وبدأ الموضوع يزيد شوية شوية ونقول للولاد إمسح مناخيرك بالتيشو عشان كلمة منديل بلدى والبس السليبر لان مش معقول بقي حتقوله البس الشبشب (عيب ) وندخل اولادنا مدارس انترناشيونال ويفرضوا على الأب والأم يتكلموا بالانجليزى مع أولادهم طوال الوقت
طيب لحد دلوقتى حلو مفيش اى مشكلة
لكن للأسف نسينا زى ما أجبرنا الطفل إنه يتكلم لغة تانية وصدرنا له ثقافة تانية بتاعت ناس مش زينا فى كل حاجة إننا نعلمه طبعنا إحنا كعرب فى الإحتشام والخجل وبر الوالدين والأصول فى الكلام وصلة الرحم وإن بيت الأب والأم ومكانتهم حاجة ليها إحترام وإجلال وإننا مجتمعات بتعتز بنفسها ٠
طول الوقت بنفرجهم افلام الغرب ونسمعهم اغانيهم وإحنا مش فاهمين إنها كلها بتهدف الى الحرية المفرطة البعيدة عن أخلاقنا وأطباعنا فنلاقى الولد بيقول لأبوه
انا حعمل اللى انا عايزه انا حر مش مجبور على العيشة معاك أنا حر أصاحب البنات وأعيش معاها كمان لو عايز والبنات اللى تحلق شعرها وترسم الوشم على جسمها كله والاب لا يجرؤ انه يغلطها
طبعا ما هو السبب فى الاصل ماهى كانت بترجع البيت وقت فراغها وتسافر مع اصحابها كام يوم وهو يقولها إنچوى يابيبى
مجتمعنا ليه زعلان دلوقتى من الناس دى
مش احنا اللى كنا بنبص عليهم ونقلدهم
ونتمنى نبقى زيهم وجرينا وراء موضات وتريندات مش لينا وأتت بالخراب على بيوتنا واولادنا
اللبس الفاضح بقى هو العادى و الست المستورة اللى بتلبس واسع بيتقال عليها دى مبهدلة والحقيقى إن الضيق والكاشف للعورات هو البهدلة بعينها
الستات الكبيرة اللى بلغت من العمر ارذله بتلبس لبس بنات العشرينات بدون خجل ولا خوف من الله ونسيت انها على وشك مقابلة مع ربها
امتى حنرجع ونفوق ونعرف ان كل اللى مشينا فيه كان غلط ومش شبهنا
لو حرصنا على أن مُتع اولادنا تكون فى السباحة وركوب الخيل والرياضة إعطاؤه الحرية المنضبطة نقوله اخرج مع اصحابك واتمتع بكل شئ مادام حلال ويرضى ربك ٠
وأخيراً همسة فى أُذن كل أب وأم التحضر ومواكبة العصر شئ جميل لكن ربوا أولادكم بالعربي
