أنا بحبك وانت بتحبني..
وفلان بيحب فلان
والاخوات والحبايب والجيران
كل ده شيء جميل
بس لازم نحافظ على مساحة دايما بينا
مش لازم نتعري قدام بعض في كل حاجة
مش لازم نبقي كتاب مفتوح طول الوقت
في حاجات كتير في حياتنا بنسميها عورات
مش لازم نظهرها قدام حد
البيوت مثلا لها حرمة وكشفها عورة
ماتطلبش زيارة حد في بيته برده بإلحاح
مايمكن غير مستعد لاستقبالك
الاكل ما تسالش واحد اكلت إيه وبكام
او السؤال عن الدخل او لابس ايه
النوم مثلا واحد بيقلك بحب أنام لوحدي ..
إنت بقي لا يا عم الونس
يقولك ما ينفعش تقوله بنسلي بعض
ما يمكن عنده مشكلة صحية
او بيشخر وهو نايم …او بيخطرف
ما كل ده عورة
مهما كان الحب والتقارب لازم في مساحة
يعني مثلا امك وأنت صغير
كانت بتحميك وتشطفك
هل دلوقتي بعد ما أنت كبرت
ينفع تقعد عريان قدامها
هو الموضوع ببساطة إن الحب
مش معناه إننا نعري نفسنا قدام بعض
دايما في مساحة من الخصوصية
حتي بين الزوج وزوجته في العلاقة
الرسول عليه الصلاة والسلام قال فيما معناه لا تتجردوا تجرد العير
فيا ريت بلاش نزعل من بعض
كل واحد بيبقي عارف التاني بيحبه أد إيه
كل واحد بيحب يظهر للطرف التاني أحلي حاجه فيه
مش يقوله اصلي صريح او إنت كتاب مفتوح بالنسبة لي
بجد حافظوا على المساحات عشان تدوم المحبة
ده راييي مستنية ردكم لو حد عنده راي تاني
وياريت كمان لوحد مريض
بلاش تساله عن تفاصيل مرضه او ادويته او عمل ايه
اتصل اخبارك إيه وربنا يشفيك وخلاص
ما جايز هو مش عايز يقول حقيقة مرضه لحد
عشان ياخد ثواب الابتلاء إللي هو فيه او عشان مش عايز يشوف نظرات الشفقة
مش لازم تفاصيل يا جماعه
اكتر واحد بيتعب من التفاصيل هو صاحبها
بقلمي هاله فوزي
