جهاد نوار
مما قرأتُ لك
النهارده هناخد كلمتين مبقوش يتقالوا وسط الاسكندرانيه .. يعنى مثلا يقولك الراجل ده ابواحمدات .. ويقولك الراجل ده فااييس
الجمله الاولى بنقول على الراجل ده ابواحمدات .. يعنى راجل جدع وبيقول الحق ف عين الكبير .. ومبيخافش من حد .. وعلى الاساس ده كل منطقه كانت تختار الراجل الجدع اللى فيها ويبقى فتوة المنطقه .. هو اللى يجيب حق الناس من بعض بدون الرجوع (للكراكون ) الللى هوقسم الشرطه حاليا .. ونحكى بقى قصه ابو احمدات زز ده بقى كان اسمه عبد الحميد عمر احمد ( الشهير ب حميدو الفارس )كان قبل الشهره كفتوه معتمد من الكراكون كان اسمه عبد الحميد ابو احمد ..عبد الحميد الناس بقت تنتدهه ب حميدو دلع اسم عبد الحميد ..واشتهر ف التلاتينات والاربعينات فى حى الانفوشى .. كان راجل ضخم .. وكان لما يكون فيه خناقه تبع منطقته .. مكانش يستعمل اى سلاح .. كان بيضرب بايده .. او بالدماغ اللى بنسميها الروسيه .. وكان اللى يضربه يسقط ف ساعتها ..
صادف ان كان بيبقى فيه مسابقات قوارب ف الميه .. بيشرف عليها الخديوى ف الوقت ده .. وقرر عبد الحميد انه يشارك ف السباق بين الانفوشى والسياله .. وكسب عبد الحميد السباق .. والخديوى احب يكافئئه .. فرمى لها شوية ريالات فضه على الارض .. رفض عبد الحميد يوطى ياخدها .. وده خللى الخديوى ياخد موقف منه .. رغم انه عارف انه فتوه قوى .. فطلبه الخديوى ف قصر راس التين ..وراح له عبد الحميد .. كان الخديوى عنده خادم نوبى وكان قوى البنيه .. وضخم الجثه .. قعد الخديوى وطلب الخادم ييجى.. وطلب من عبد الحميد يصارع الخادم .. وهومتاكد من قوة بنيان خادمه .. وافق عبد الحميد على المصارعه .. ومن بدايه الصراع كان عبد الحميد ضرب الخادم بالروسيه فسقط مغمى عليه .. فقام الخديويى سلم عليه واعطاه بعض المال .. واطلق عليه اسم الفارس .. ومن يومها بقى اسمه حميدو الفارس .. اللى بيضرب من غير سلاح .. وعشان كده لما يكون فيه تحدى بين اتنين .. واحد يقول للتانى تنزل لى فارس لفارس ؟؟ يعنى تصارعنى بدون سلاح ولا نبوت ولا عصايه ولا مطوه ..
واتحول اسم عبد الحميد عمر احمد .. من ابواحمد .. الى حميدو الفارس .. ولما نيجى نعلى من قيمه واحد جدع وبيجب الحق .. يقولوا عليه فلان ابو احمدات .. يعنى كذا ابو احمد ف بعض امعانا ف التعظيم
اما بقى لما نقول فلان ده فااييس .. بالضغط على الياء .. الفاييس ده يعنى الراجل الفنجرى .. اللى يفضل يطلع من جيوبه بكرم . لحد ما تخلص ويقولك جيووبه فييست .. او فلست .. والفاييس ده كان معروف انه اللى بيروح يقعد ع القهوه .. ويعزم القهوه كلها على مشروب .. ويقول لصاحب القهوه مشاريب الناس دى على حسابى .. واغلب الفييسه كانوا اللى بيشتغلوا ف القورنص الانجليزى او المعسكر الانجليزى وكانوا بيقبضوا كويس . وعشان كده كانوا بيفنجروا على الناس ف القهاوى .عشان يكسبوا احترامهم .. وياخدوا لقب البهاويه من الناس . ومن هنا جت كلمة راجل فااييس او فنجرى
والى لقاء فى كلمات اخرى ضاعت مع الزمن
