بقلم/سناء عمر عكوش
الكبير كبير …..مقام و …..عقل و ……احترام
الدُنيا هتعلمك ازاي تتعامل مع كل الأصناف من الناس بس أهم حاجة لازم تتعلمها انك مَتتأثرش بحد فيهم عشان في فرق كبير بين انك تعامل حد و انك تبقى زيه
احنا بنقابل فى حياتنا ناس كتير منهم الناس الصح ومنهم كتيررر الغلط وفى ناس برضه هتفهمك صح زى ما انت وفى ناس مصممه تفهمك غلط وهيقولوا عليك ما ليس فيك مش مطلوب منك انك تمسك ودن كل حد وتقوله لا انا كويس اللى مطلوب منك انك تفلتر بقى الناس فى حياتك وكل حد يكون فى مكانه الصح فيها….زعلك مهما كان كبير فالحقيقة الأكيدة إن محدش هيحس بيه غيرك ،
محدش هيحس بمُعاناتك ولا حُزنك غير نفسك ،
لاء وممكن تلاقي حد يقولك زعلك مش مستاهل .
فمحدش هيحس بمعاناتك الا انت ..
فلا داعي للتمثيل، فنحن نعرف لون قلوبكم بأفعالكم لا بكلامكم.
فاكتر حاجه عملتها صح الفترة الاخيرة اني صاحبت نفسي كنت بستغرب الموضوع دا زمان اوي واقول عليه دا جنان وان اللي بيعمل كده بيعمل كده ازاي اصلا؟! بس فعلا اما بدأت واحده واحده اني اتكلم مع نفسي و اطلع كل اللي في قلبي معاها لقيت اد ايه فعلا الموضوع دا مريح جدا وحقيقي بيقويك اكتر و بيخليك مع الوقت شخص فاهم نفسه و عارف هو عايز ايه .. بقيت من وقتها بحكي كل حاجه لنفسي و افضفض معاها و لو زعلانة بطيب خاطرها و اواسيها واما بتغلط بفضل اعاتبها و اجلدها بالكلام علشان افوقها واخليها تتعلم و اما تعمل حاجه كويسه و تنجح بشجعها وبكافئها و اجبلها حاجه حلوه كمان ..و بصراحه لقيت في نفسي الونس الحقيقي و الصاحب الوفي اللي عمره ما هيتخلي عني في يوم ولا هيتغير عليا ابداً ..
و الشجاعه الحقيقيه أن تفوز في معاركك الداخليه التي لا يعرف أحد عنها شيئاً.
فيه مقولة عظيمة بتقول يَسخر من الجروح من لا يعرف الألم فـ وفر شكوتك لنفسك لانهم ببساطة مش مكانك
