________
د .ا لسيد عبدالستار محمد
أستاذ مساعد بقسم تكنولوجيا الأغذية والألبان
بكلية التكنولوجيا والتنمية – جامعة الزقازيق
________
تخيل حضرتك أتقدم لك خمسة عبوات من نفس المنتج بس لشركات مختلفة والعبوات مش مكتوب عليها أي بيانات غير (1-2-3-4-5) واتطلب من حضرتك تحكم عليهم تحكيم حسي وحد من المحيطين بك قالك ان العينة رقم (5) دي لأشهر براند في السوق للمنتج دا هل تحكيمك يتأثر؟
الحقيقة نعم
ليه بقى؟
لان البراند صارف ملايين عشان يعمل لحضرتك الجو دا ويحافظ على رسالته التسويقية اللي باني عليها المجد الخاص به. البراند بيشتغل على عدة محاور أوضحها في عدة نقاط :
1- المكانة الاجتماعية : البراند يستهدف طبقة معينة وبيفرض لها خصوصية وميزة اجتماعية مقارنة بالطبقات الأخرى غير المستهدفة.
2- الحملات الاعلامية والدعائية: قد تكلف منتجي البراند الملايين ليقوم ممثل أو لاعب كرة مشهور بالدعاية للمُنتج في الوسائل المرئية والسمعية ووسائل التواصل الاجتماعي أو من خلال الإعلانات الممولة والمدفوعة أو مشاهير البلوجر واليوتيوبر.
3- الخدمة المقدمة: بتكون ممتازة سواء خدمة ما قبل أو أثناء أو ما بعد البيع. لإن العاملين بمجال التسويق عندهم عقيدة إن (100 ريفيو إيجابي على مواقع التواصل الاجتماعي) في حق المُنتَج يزود عدد الزبائن ( زبون واحد) بينما (ريفيو واحد سلبي على مواقع التواصل الاجتماعي) يُقلل عدد الزبائن (100 زبون)
4- الجودة : بتكون عالية جداً مقارنة بالشركات المنافسة, والجودة تكون ثابتة مع تغير المكان والزمان ودا بيسمى (عولمة البراند).
5- التصميم : سواء في شكل المنتج , شكل العبوة , طريقة التغليف , اللوجو ,Slogan أو الإعلان الخاص بالبراند يتم توكيله لشركات عالمية متخصصة .
6- الضغوط النفسية: أغلب البراندات بتشتغل على الاطفال , المراهقين , المراهقات والسيدات بسبب ان الفئات دي هي أكتر الفئات هشاشة نفسية وبالتالي بتتعرض لضغوط نفسية من ابسط الاسباب والضغوط النفسية بتشجع جداً على التسوق أو الخروج للأسواق.
7- الثقة: لو حضرتك حابب تشتري أي مُنتج بمجرد انك بتشوف اللوجو الخاص بالبراند بتطمن.
عزيزي المُنتِج أو المُستثمِر ورجل الصناعة :
* فرصتك ممتازة لتطوير منتجك وجعله منتج مُنافس للماركات بتطبيق البنود السابقة بتكلفة أقل في حدود امكانياتك.
* الإنتاج هو الحل.
عزيزي المُستهِلك :
* حضرتك بتتحمل التكلفة الاضافية لتغطية البنود السبعة السابقة والتي قد تكون عشرات المرات من تكلفة انتاج المُنتَج الاصلية.
* حضرتك مش ها تموت لو استغنيت عن أو استبدلت ماركة بمنتج عادي جودته عالية.
* الماركات هي أكبر كذبة تسويقية صنعها الأذكياء لسرقة الأغنياء فصدقها الفقراء.
