بقلم / رحاب النقيب
انك تكون شخص سام ومؤذي وباصص للناس في حياتهم وعيشتهم دي حاجه مش حلوة ؛
انك تكون حاقد ومستكتر عليهم اللي هما فيه دي مش شطاره؛
انك تعملهم مكايد وتعملهم خطط وتألف سيناريوهات عشان تنكد عليهم حياتهم دي مش فهلوه ؛
انك طول الوقت تقارن نفسك بيهم وتقولهم يابختكم ده اسمه عدم رضا ؛
انك تفضل تتمني زوال النعمه من اللي احسن منك لمجرد انه شخص ناجح وانت فاشل كدة انت شخص مريض ؛
الاذي مفيش اسهل منه بس ليه مفكرتش لثواني !!!
هو ليه الشخص دة ناجح؟
هو ليه ربنا مميزه بحاجات مش عندي؟؟
ليه برغم ظروفه اللي مر بيها لسه واقف علي رجله وموقعش؟
طب هو ليه برغم كل اللي بعمله فيه مفكرش مره يرد عليا هو كمان ويحاول يأذيني؟؟
طب انا ليه واقف مكاني؟
هو انا ليه دايما مش حاسس برضا وبالنعم اللي عندي برغم اني يمكن حياتي مستقره؟؟
طب انا ليه دايما شايف اني مش هعرف ابقي زيه عشان كدة عايزة هو اللي يبقي زي؟؟
هقولك؛
عشان انت دايما باصص للي في ايد غيرك ،
عشان انت دايما مهما كان عندك نعم مبتشكرش عليها ربنا ولا بتحمده ،
عشان انت دايما باصص للناقص وبتبص علي نص الكوبايه الفاضي،
عشان انت واقف تتفرج بس فلان راح فلان جه فلان سافر فلان اتخرج فلان اتجوز ومركز معاهم ،
عشان دايما عمال تقول يابخته عنده ،يابختها عملت يابختهم قادرين، ومش مدرك ولا فاهم ان ممكن حياتك تكون اصلا افضل منهم في حاحات كتير جدا ،
عشان هماقلبهم نقي وبيحبوا الخير لكل الناس وبيساعدوا وجدعان و ربنا بيكرمهم وبيقف جنبهم،
وربنا بيعوضهم بالحاحه اللي بتحسدهم عليها دي لعدم وجود حاجات تانيه مش عندهم وعندك علي فكره،
عشان هما بيشتغلوا علي نفسهم وبيتعبوا وبيشقوا وبيصحوا بدري وبيسهروا للصبح عشان يحققوا حلم عندهم او عشان يطوروا نفسهم وشغلهم في عز ماانت نايم ومرتاح ،
عشان انت واقف مستني بس تتفرج وتقارن حياتك بحياه الناجحين وتقول ازاي اخطط اعطلهم واخليهم يفشلوا ازاي ادبر لهم مكايد واخرب عليهم الفرحه والنجاح اللي في عيونهم ،،،
دايما متفائلين وعندهم حسن ظن بالله برغم ان ممكن كل الظروف تكون ضدهم بس هما عندهم يقين ان ربنا هيقلب كل حاجه لصالحهم
(انا عند ظن عبدي بي فليظن عبدي مايشاء) وانت سلبي ونظرتك لكل حاجه فيها تشاؤم وسلبيه….
عايز تفضل كدة؟؟؟؟؟ ولا عايز تبقي زيهم؟؟؟
سؤال مهم اجابته عندك لوحدك انت بس اللي قادر تقرر انت عايز تبقي ايه
تبقي واقف مكانك وباصص بس عليهم وبتتحسر علي حالك؟
ولا عايز تبقي زيهم؟؟؟
لو قررت تاخد خطوة وتبقي زيهم لازم تعرف كام نقطه مهمين جدااا
احمد ربنا واشكره اولا علي كل النعم اللي عندك دة اولا وبطل تشتكي
قرب منه وصلح علاقتك بيه لو علاقتك بربنا اتضبطت حياتك هتتصلح
اشغل نفسك بحالك
حاول تطور نفسك اقرا اتعلم حاجه جديدة العب رياضه
ادرس ادخل دورات او كورسات
حاوط نفسك بناس ناجحه الصاحب ساحب هيشدوك لفوق معاهم ،
بأكد تاني احمد ربنا علي الموجود وارضي بيه واسعي انك تبقي شخص افضل من نسختك الحاليه،
بطل تقارن نفسك باللي حواليك وتتمني زوال النعم منهم بل بالعكس لما تدعي لنفسك ادعي للي حواليك بنفس دعواتك ،
الخلاصه طهر قلبك ونظفه عشان تكون شخص سوي
وربنا يحبك .حب لاخيك ماتحبه لنفسك .
وان الله اذا احب عبدا رزقه بلين القلب .
