بقلم….سناءعمر
. ساعات بيبقى عندناطاقة حب عايزنها نوزعها على
الناس كلها .عايزين نسأل على كل اللي واحشنا …عايزين نعبر عن حبنا ليهم كلهم …عايزين نضحكهم و نفرحهم ..عايزين نجيبلهم كل الدنيا ..عايزين نلف على المستشفيات ..نطبطب عل كل عيانين …مش عايزين نشوف حد تعبان او زعلان او وحيد …كل الناس ..مرة واحدة …و نمشي انتنطط و نجري من الفرحة كل ما نرسم بسمة على وش حد
و ساعات … بيبقى حتى اللقمة مالهاش طعم .. النفس مخنوقه ..كإنه من خرم إبرة … حتى لبسنا مش طايقينه…الكلمة على لسانا تقل جبال …مفيش طاقة نسمع حد و لا نشوف حد ..مفيش صبر حتى نقرا كلمتين زيادة مفيش نفس ننقي لبس و لا نخرج و لا نشوف مخلوق … و لا طايقين حد يسألنا حتى مالكم ؟؟ كل الألوان كلها بتتحول ف عيونا للون واحد بدرجاته . عايزين نهرب من كل العيون ..من اي سؤال ..من اجابات و تبريرات.. و لا حتى كلمة ( ماحدش ليه دعوة بينا ) حتى ديه ..تقيلة … مفيش طاقة نصالح حد …اللي يزعل يزعل …اللي عايز يفهم غلط ..يفهم …اللي عايز يبعد …مع الف سلامة و خد الباب وراك …و القلب داعيلكم
بس الأحلى من دة و دة …ان ف كل الحالات …دوام الحال م المحال …بتلاقي ربنا بيبعتلك حاجة كدة ..تطبطب ..و ترميلك نسمة هوا تاخدوا بيها نفس طوييييل …يخلي دمك يجري تاني ف عروقك …وشك ينور ..و ترجع تحب الدنيا تاني .. ممكن يكون اي حاجة .ممكن خبر حلو …اي حاجة ماتعرفش تيجي ازاي و من مين …بس الأهم انك تستغلها اول ما تلاقيها ..اتشعلق ف الفرحة ..اتلكك للضحكة ..افتح صدرك خلي الشمس تدخل قلبك ..اهرب من النكد …انساه…ماتستلمش ابدا … ما تخليش حاجة تاخدك من نفسك ..و لا تحبسك جوا نفسك …طول ما فينا نفس ..لازم نعيش ..مبسوطين
