بقلم سارة وجيه
سنة 1973م قام مجموعه لصوص بالسطو المسلح على بنك كريديتبانكين ..
فى مدينة السويد وتحديداً فى “ستوكهولم”
و فى اثناء عملية السطو دي احتجزوا مجموعة من الرهائن لمدة 6 ايام..
الغريبة ان اثناء الفترة دى الرهائن ارتبطوا (عاطفياً ) جدا بالخاطفين !!
لدرجة انهم كانوا بيرفضوا يساعدوا الحكومة للوصول للخاطفين .
الاغرب كمان ان في ناس منهم كانت بتدافع عن الخاطفين دول بعد انتهاء الازمة..
وقتها درس” نيلز بيجيرو عالم الجريمه” الحدث دة.. ومن وقتها اتعرفت الحالة دي بأسم
” Stockholm syndrome او متلازمة ستوكهولم ”
الدراسة قالت ان المتلازمة دي عبارة عن ظاهره نفسية بتحصل لما يتعاطف المجني عليه مع الجاني لدرجة انه ممكن يدافع عنه او يدخل ف علاقه عاطفية معاه .الظاهره دي بتحصل بنسبه 8% من ضحايا الاختطاف ..
والمتلازمة دي بتظهر بشكل كبير جدا فى العلاقات العاطفية اللى فيها طرف بيتعرض دايما للتعنيف الجسدي او اللفظي ودة بيكون ( الضحية او المجنى عليه) والطرف التانى بيكون هو (الجانى) فى اغلب العلاقات دي بنشوف ان الطرف المعنف متضامن بشكل كامل مع الطرف الجاني بل بالعكس ده ممكن يشوف دة شكل من اشكال الحب ويوجدله مبررات !!
وده بيوضح اسباب استمرار علاقات كتير فيها طرف ضحية وطرف جانى.
