في حب مبيكملش لكن مبيتنسيش ..
دا بيستخبي جوة ركن بعيد كدة في قلبك محدش يشوفه ولا يحس بيه غيرك انت و مبيظهرش عليك في تصرفاتك حتي يعني مبتكونش قصاد الناس باين انك بتتعذب بقا و مش عارف تعيش ولا تشتغل ولا تمارس حياتك بصفة عامة ..
لا دة مبيحصلش و دة لاسباب و ظروف مختلفة و نتيجة مسئوليات كتير في رقبتك مبتقعدش تبكي علي الاطلال
زي مابيقولو لا بتكمل حياتك بتعيش و تشتغل و تتكلم و تهزر و تخرج زيك زي أي حد …. و لكن مع كل دة حبك مستخبي جواك مبتعرفش تنساه انت بس
حابسه جوة قلبك ..
و موضوع الحبس دة … بيختلف من شخص للتاني علي حسب طبيعة شخصيته بمعني ان في حد لما بيحبس الحب
دة جوة قلبه بيكون وجع مداري بيبقي احتياجه و اشتياقه لحبيبه مسبب ليه جرح بينزف ..
بيكون حبه المستخبي جواه دة عامل زي الوحش رافض يتقيد او يتحبس و عمال يعافر .. زي البركان إلى كل ما تفكر انه خلاص بقا خامد تتفاجئ انه لسة بيثور و ناره بتحرق قلبك لانك مبتكونش راضي و مقتنع انه خلاص
مفيش نصيب مبتكونش قادر تتاقلم من غيره و دة بيكون من ابشع و اسووء انواع حبس الحب جوة القلب ..
و بيفضل يعذبك و يألمك طول الوقت
وفي نوع تاني من حبس الحب …
و هو انك بتخبيه جوة قلبك بس بشكل تاني بتفضل محتفظ بس باللحظات الحلوة و الذكريات الجميلة اللي بينكم … بتفضل فاكر المشاعر اللي عشتها مع حبيبك و اللي
مستحيل تتكرر مع غيره بيكون الحب اللي جواك دة هو الملجأ و الملاذ الآمن ليك اللي بتهرب ليه لما بتكون
مضايق او مهموم او حتي في لحظات الصفا بتلجأ ليه و تسترجعه لما تحب تفصل عن الدنيا و الاحداث
و الظروف و الضغوط اللي انت فيها .. مجرد انك بتغمض عنيك و تسترجع احساسك و مشاعرك وقتها دة لوحده كفاية انه يهون عليك و يغير مودك .. ودة في وجهة نظري هو الأفضل و الأريح بكتيير ..
انتو حبيتو و أخلصتو في حبكم و اتمسكتم ببعض و لاسباب مختلفة محصلش نصيب و كل واحد خلاص راح لحاله .. الحياة منتهتش ولا هي اخر الدنيا .. الحياة كدة كدة هتمشي وتستمر بمزاجك او غصب عنك ..
جايز ربنا يقدرلك تحب تاني و تنسي
الحب اللي كنت فاكر انك هتموت من غيره و جايز ماتنساش وتفضل مخبي حبك جواك بس لما دة يحصل حاول تكون من النوع التاني .
تخلي الحب دة سرك الخاص و الركن البعيد الهادي بتاعك اللي بيفصلك عن مشاكل الدنيا و تعبها …
خليه يكون مصدر لرسم ابتسامة علي وشك و لو للحظات بلاش يكون سبب ف انك تكره حياتك او تزود علي نفسك هموم الدنيا .. لوعة الحب ووجعه وعذاب شئ قاسي جدااا
ربنا يكفيكم شره ..🖤
