بقلم مروه عدلي
هل كل علاقة غير صحية هي علاقة سامة؟؟
لا طبعاً، مش كل علاقة غير صحية هي علاقة سامة.
هناك ثلاث انواع للعلاقات لازم نعرفهم عشان نقدر نفرّق بينهم:
١- العلاقة الصحية: و دي كل طرف فيها بيستمتع بالوقت اللي بيقضيه مع الطرف الثاني و بيسمع له ويحاول يفهمه ، الحوار و المحادثات بين الطرفين مفتوحة، فيه ثقة متبادلة واحترام متبادل، فيه احترام للحدود الشخصية لكل طرف، حل المشكلات بيتم بالاتفاق و باسلوب عقلاني مرن، كل طرف بيدعم و يساند الطرف الثاني عشان يطور من ذاته، عملية صنع القرار مش احادية يستحوذ عليها طرف عن الطرف الثاني.
٢- العلاقة الغير صحية: وفي العلاقة دي الطرفين بيقضوا وقت مع بعض لرفع العتب، لكن كل طرف عايش عالمه الخاص بيه. النقاش بينهم سرعان ما بيتحول لجدال ويستنفذ قدر كبير من طاقتهم، موضوع الثقة بينهم ده موضوع شائك فيه اعتبارات كتير، بشكل او بآخر فيه قلة احترام بينهم وعشان كده محاولة حل المشكلات مش بيتم بطريقة عقلانية بمعنى انه لازم حد يغلّط التاني او طرف دايماً هو الضحية، فيه اهمال للحدود الشخصية، ونقد مستمر و سخرية لاختيارات الشريك او قراراته.
٣- العلاقه السامة: و في العلاقة دي صعب نلاقي شيء كويس، فيه محاولة من طرف لاحكام السيطرة بالطرف الثاني ، التلاعب و محاولة ايهام الطرف الثاني باشياء غير حقيقية ، انعدام تام للثقة مع وجود شكوك و ريبة، انعدام نهائي للاحترام و الحدود الشخصية بيتم هتكها ، حل المشكلات بيتحول لحرب و دمار بين الطرفين، كذب خداع عنف جسدي، لفظي، عاطفي.
اعتقد دلوقتي نقدر نفرّق بين انواع العلاقات و لا نوصم اي علاقة غير صحية بانها علاقة toxic
