بقلم.. سناء عمر
يعني متحاولش تربط حد.بيك وانت مش عارف النهاية لعلاقتكم ولا انك توعد وعد وانت مش واثق إنك هتنفذه فاوعد بالحاجة اللي تقدر عليها اللي انت واثق فيه بس ، لان فيه ناس بتتعشم وبتبني احلامها ع وعدك ليهم ،، بيكون هو الخيط اللي ممكن يتعلق بيه اي انسان .. القشايه اللي بيتعلق بيها الغريق .. اوعي تعشم حد وتديله الامل وتخلي بيه .. ممكن يقاوم الدُنيا ويتحدي العالم علشان عنده امل وثقه فيك .. مُتفائل انك يستحيل تخذله او تخلي بيه .. الفيران في تجربة د “Curt Richte” قعدت تقاوم علشان عندها يقين ان في حد هينقذهم .. الانسان ممكن يتغير ١٨٠ درجه لو انسان علقه بحلم ” سواء جوازه .. شُغلانه .. يساعده يحقق حاجه معينه ” والله ممكن ينام ويقوم يحلم باليوم دا ! في ناس ممكن تعلق احلامها وطموحتاها علي كلمه ووعد منك ! وكمان حاجه تانيه : ممكن الانسان قرارته تتغير وتبقي تهد جبال لو نفسيته حلوه ! .. العيل الصغير بيصحي بصعوبه للمدرسه وبطلوع الروح .. بس يوم العيد بيصحي الفجر وممكن يطبق ! من فرحته .. ودا اكبر دليل لحديث النبي ” الكلمه الطيبه صدقه ” ! مهو مش صدقه من فراغ .. صدقه عشان بتقوي والابتسامه صدقه عشان بتدفع لقدام .. تخيل دكتور الكليه طبطب علي كتف الطالب وقاله انا متاكد انك قدها .. تخيل واحد قال لمراته انا مقدرش استغني عنك وجبلها وردايه .. دي ممكن تولع ف البيت من فرحتها .. اوعي تدي الامل لحد وتقطعه .. جايز تكون انت الحبل الوحيد اللي غيرك شادد فيه .. واوعي تكون بايدك تفرح حد وتحزنه وتكسر بخاطره كدا انت بتهده وانت مش واخد بالك.. اوفي بوعدك وفرح اللي منك .. لان ربنا هيحاسبك علي كدا يوم القيامه .. الحُزن بيهد زي ماقال بن القيم : الحُزن يُضعفُ القَلب ، و يُوهنُ العزم ، و يضر الإرَادَة ، و لا شَيء أحبُ إلى الشّيطان من حُزن المُؤمن.. !
وصالح سليم قال عن الوفاء بالوعد :
لا اعتقد ان هناك سبب حقيقي يجعل رجل حقيقي لا يوفي بوعده الا شيء واحد .. قالوله هو ايه ؟ قالهم الموت ! :))
في النهاية خدها جملة قاعدة في حياتك في كل تعاملاتك مع الناس عشان متأذيش ولا تكسر حد مالوش ذنب لان لومنفذتش وعدك معاهم بيتصدموا ، وصدمتهم ممكن تكسرهم وتدمرهم ، وأنت اللي هتشيل ذنبهم في الآخر❤️
وفي اخر الكلام خليك عارف إن الوعد دين لا يسده إلا الرجال
ف خليك أد كلامك في كل الاحوال♥️
