بقلم الشاعر : حسن حلمى
لملمولي الورد يلا يا حبايب
قبل ما البدر ينور على اللى غايب
يوم يبات بحضن قلبي
ويوم مفارق
بس عيني الليلة شايفه
طيفه فارق
غربة ليها سنين كتيرة
وقلبي صابر
عمره ما حس بيوم
أنه هاجر
لملمولي الورد يلا
يا حبايب
قبل ما البدر ينور
على اللى غايب
زيه مين فى الدنيا ديه
و مين حبيبي
ولا مين يقدر يغير
قدري و نصيبي
لسه فاكر كل غنوة
غنهالي
لسه شايفه كأنه
ساكن يوم قبالي
كان زمان وسنين
وعدت
بس عيني مشتقاله
كل ضحكة ضحكتهاله
وكل همسة همستهاله
شوفت يوم الورد فتح
فوق خدوده
ولا عطره يفوح بعوده
كأنه مسك ومسقى عنبر
لما يلمسني بشوقه
بنبض قلبه
دقة تسكن يوم وريده
ودقة تسكن جوه قلبي
حد فيكم حسه قبلي
ولا أنا
وحدى اللى عايش
وسط بستان الورود
عطره يهديني بعود
ولا نغمة تدق عود
تحكي للخال الحكاية
كنا زى طيور مهاجرة
وافترقنا بالمدينة
من يومها الدنيا عتمة
حتى عطر الورد فارق
