بقلم /مروه عدلي
كأنها جملة بنسمعها كل يوم: “الناس اتغيرت”.
بس يا ترى… الناس فعلاً اتغيرت؟ ولا الظروف هي اللي غيّرتهم؟
زمان كانت الحياة أهدى، أبسط، والقلوب أطيب. الجيران زي الأهل، والصداقة كانت بالعِشرة، مش بالمصلحة. النهارده بقى كل واحد في حاله، وكل حاجة بقت “بالعافية” حتى السؤال.
السرعة اللي بقينا عايشين بيها، ضغوط الحياة، وغلاء الأسعار، كلها خلت ناس كتير تفكر في نفسها الأول، وتنسى تشارك أو تهتم. في ناس بتتغير غصب عنها، وناس تانية بتختار تتغير علشان تتأقلم، وتعيش.
بس في وسط ده كله، لسه فيه ناس طيبين، لسه في قلوب بتفكر، بتسأل، وبتحب الخير. الفكرة إن الزمن بيتغير، والتحديات بتزيد، لكن الأصل موجود. واللي جواه خير، بيبان في أفعاله حتى لو الدنيا كلها اتغيرت حواليه.
المشكلة مش بس في الناس، المشكلة كمان إننا بقينا نحكم بسرعة، ومانديش فرصة نفهم بعض. بقينا نخاف من الطيبة، ونشك في النية الحلوة.
لكن دايمًا فيه أمل. لو كل واحد فينا بدأ يراجع نفسه، ويحاول يكون هو التغيير اللي بيتمناه، يمكن الدنيا ترجع أحلى شوية. مش لازم نرجع زي زمان، بس نقدر نكون أحسن من دلوقتي.
