كتبت – إيمان عمارة
مع دخول فصل الشتاء، بيبدأ الكل يدور على طرق تحافظ على الدفا، من المشروبات الساخنة، والأكل الغني بالسعرات، للملابس الثقيلة، لكن القليل جدًا من الناس يعرف إن لون اللبس نفسه ممكن يكون سبب في إحساسك بالبرد أو الدفا، الألوان مش بس عنصر جمالي، لكنها كمان عامل فيزيائي بيأثر على امتصاص الجسم للحرارة أو عكسها.
كما أن الألوان الداكنة تمتص أشعة الشمس وبتحتفظ بالحرارة، الألوان الفاتحة أو الباردة بتعكس الضوء، فبتخلي الجسم يحس ببرودة أكتر، حتى لو اللبس تقيل أو مصنوع من خامة دافئة، وعشان كده، في الشتاء فيه مجموعة ألوان لابد أن نتجنبها لأنها فعليًا “بتبرد الجسم”،وتخلي إحساسك بالبرد أقوى.
الألوان اللي لازم تبعد عنها في الشتاء:_
الأبيض: “رغم إنه أنيق وراقي، لكنه بيعكس أغلب أشعة الشمس، فبيخلي حرارة الجسم تهرب بسرعة”
الرمادي الفاتح: “من الألوان المحايدة اللي مش بتمتص حرارة، وبيزود الإحساس بالبرودة في الجو الغائم”
الأزرق الفاتح: “لون جميل ومريح للعين لكنه من “الألوان الباردة” اللي بتدي إحساس نفسي وجسدي بالبرد”
اللبني أو السماوي: “من أكثر الدرجات اللي بتعكس الضوء وبتخلي الجسم يفقد الإحساس بالدفا، حتى لو اللبس قطيفة أو صوف”.
الوردي الفاتح: “بيعتبر من الألوان الرقيقة، لكنه ما بيمتصش حرارة وبيزود الإحساس ببرودة الأطراف”
الموف الفاتح: “لون جميل لكن تأثيره النفسي بيخلي الشخص يحس ببرودة، وده مثبت في دراسات علم الألوان”
الأخضر النعناعي: “لون صيفي بامتياز، بيرتبط بالإنتعاش والهواء البارد، وبيخلي الجسم يفتقد الإحساس بالدفا”.
الفضي: “من الألوان المعدنية اللي بتعكس الضوء بقوة، وده بيقلل امتصاص أي حرارة”.
البيج الفاتح: “رغم إنه كلاسيكي، لكنه بيفقد الجسم الإحساس بالحرارة لأنه قريب من الأبيض في تأثيره”.
الأصفر الباهت: “بيعطي شعور بالنشاط لكنه من الألوان اللي بتعكس الضوء بدل ما تمتصه، فبيكون غير مناسب لأيام البرد الشديد”.
اختيار اللون مش بس ذوق، لكنه جزء من “ذكاء اللبس”، يعني لو الجو بارد جدًا، اختار لون غامق وخامة دافئة زي الصوف أو القطيفة، ولو في شمس ضعيفة، حاول تلبس درجات منتصف زي الزيتوني أو الكحلي، لأنها تدي توازن بين الدفا والأناقة.
في النهاية، تذكّر إن الدفا مش دايمًا في السمك أو الخامة، أحيانًا في اللون نفسه، اختار ألوانك بذكاء، خليك أنيق، بس الأهم خليك دافي.
