تعفن الدماغ (Brain Rot): وباء العصر الرقمي وطرق استعادة القدرة على التركيز
كيف يؤثر إدمان المحتوى القصير على صحتك النفسية وقدراتك العقلية؟
دكتورة: دينا جمال
بتصحي الصبح تفتح التيك توك، تسكرول 15 دقيقه من غير ما تاخد بالك ده لو مكنش ساعة.
بعدين تقوم تفتح الانستجرام، ريلز ورا ريلز، فيديوهات قصيره سريعه مليانه الوان وحركه وصوت عالي.
بعدين منصة أكس شويه، يوتيوب شورتس شويه، وفجاه تلاقي ساعتين تلاته عدو وانت مش فاكر حاجه شفتها، مش حاسس بحاجه، بس دماغك تعبان ومش قادر تركز في اي حاجه تانيه.
ده اسمه Brain Rot او تعفن الدماغ، ومش مجرد مصطلح ترند، ده حاله حقيقيه بيمر بيها ملايين الناس دلوقتي.
دماغك بقى زي الاسفنجه المبلوله، مش قادر يمسك معلومه، مش قادر يركز اكتر من 10 ثواني، ومحتاج محفز قوي وسريع طول الوقت عشان يحس بحاجه.
والسبب الرئيسي هو المحتوى القصير السريع المكثف اللي بنستهلكه بكميات رهيبه كل يوم. الخوارزميات اتصممت عشان تخليك مدمن، تديك جرعه دوبامين بسرعه وتخليك عايز فيديو تاني وتاني لحد ما تفقد الاحساس بالوقت.
ودماغك بياخد اكتر من طاقته من المعلومات السطحيه اللي مالهاش قيمه، فبيبدا يفقد القدره على التفكير العميق او التركيز الطويل.
وتعفن الدماغ مش بس بيخليك مش قادر تركز، ده بيدمر قدرتك على الابداع، بيقتل الملل الصحي اللي بيخلي دماغك يفكر ويبتكر.
بيخليك عايش في حاله استهلاك دايم، شغال ريسيف مود طول الوقت، مش بتنتج حاجه حقيقيه.
وبتلاقي نفسك مش قادر تقرا كتاب او تتفرج على محاضرة طويلة او حتى تخوض محادثه عميقه، لان دماغك اتعود على السرعه والسطحيه.
وكمان بياثر على صحتك النفسيه.
الاستهلاك المفرط للمحتوى القصير بيزود القلق والاكتئاب، بيخليك تحس بفراغ وتفاهه، بتقارن نفسك بالناس طول الوقت، وبتحس ان حياتك مملّه مقارنه باللي بتشوفه على السوشيال ميديا.
طب ايه الحل؟ صلي علي النبي الاول وتعالى اقولك.. صل الله عليه وسلم.
اول حاجه، اعترف ان عندك المشكله دي.
لو لقيت نفسك مش قادر تبعد عن الموبايل، مش قادر تركز في حاجه واحده اكتر من دقايق، حاسس ان دماغك مشتت طول الوقت، يبقى محتاج تتصرف.
تاني حاجه، حدد وقت استخدام السوشيال ميديا. متفتحش الموبايل اول ما تصحي ولا قبل ما تنام. خصص وقت معين في اليوم للسوشيال ميديا والتزم بيه.
تالت حاجه، استبدل المحتوى القصير بمحتوى عميق. اقرا كتاب، اتفرج على فيلم او وثائقي طويل، اسمع بودكاست، اعمل اي حاجه تخلي دماغك يشتغل بعمق مش بسرعه.
رابع حاجه، مارس الملل.
سيب نفسك تقعد من غير موبايل، من غير محفزات خارجيه، وشوف دماغك هيروح فين. الملل مش عدو، ده مساحه للابداع والتفكير.
خامس حاجه، اعمل ديتوكس رقمي. يوم او يومين في الاسبوع بلاش موبايل خالص، او على الاقل بلاش سوشيال ميديا. وشوف الفرق في مزاجك وتركيزك.
تعفن الدماغ مش قدر، ده اختيار.
واختيارك انك توقفه وترجع لدماغك صفاءه وقدرته على التفكير العميق هو اهم استثمار تعمله في نفسك. لان دماغك ده اغلى حاجه عندك، ومتستاهلش تضيعه في سكرول مالوش اخر.
