بقلم د/ أماني نور
فيه نوع من الاستغلال محدش بيشوفه بسهولة… اسمه “الربا العاطفي”!
الربا العاطفي بتحسي إنك بتدي مشاعر واحتواء واهتمام… وعمرك ما بتاخدي المقابل اللي تستحقيه! ليه بترضَي؟ وليه هو واخد أكتر بكتير من اللي بيدي؟
في نوع من الاستغلال محدش بيشوفه بسهولة…اسمه ” الربا العاطفي ”
يعني إيه “ربا عاطفي”؟
الربا العاطفي ببساطة هو إنك تبقي دايمًا الطرف اللي بيضحي، يسمع، يتحمل، يحتوي…
وفي المقابل؟
تجاهل، برود، لا مبالاة، أو حتى استنزاف لمشاعرك على الفاضي!
الطرف التاني بياخد منك حب واحتواء ورعاية × ١٠
ويديكي اهتمام أو تعاطف × ٠.١
يعني الفرق كبير أوي، وده اسمه استغلال، حتى لو من غير قصد!
طيب هو ليه بيحصل كده؟
– لأنك اتعلمتي إنك دايمًا لازم تدي علشان تحافظي على العلاقة.
– لأنك خايفة تخسريه حتى لو وجوده بيوجعك.
– لأنك مش متعودة تطلبي اللي ليكي… فبتدي أكتر من اللازم.
وده بيعمل فيكِ إيه؟
استنزاف نفسي
فقدان تقدير الذات
إحساس بالوحدة حتى وسط العلاقة
دايمًا حاسة إنك “مش كفاية”
طيب ايه هو الحل؟
-️ اعرفي قيمتك، وانك تستحقي تبادُل مش استنزاف.
-️ حطي حدود صحية، وقولي لأ وقت ما تحسي إنك مش قادرة.
️ خدي بالك من إشارات العلاقة غير المتوازنة.
-️ اسألي نفسك: لو أنا وقفت عن العطاء… هل هو هيكمل ولا هيمشي؟
خدي بالك:
العلاقة السوية هي اللي فيها أخد وعطا… مش اللي فيها طرف بيدي والتاني بياخد وخلاص!
مين بتحسيه بيستنزفك عاطفياً؟
