بقلم / سناء عمر
الدُنيا مش بتُقف على حد ، وهتِتفاجئ إن اللى كُنت فاكِر إنك متِقدرش تعيش مِن غيرهُ ، هتعيش احسن مِن بعدهُ ، وهتعرف إن فى ناس ولا غالية ولا حاجة ، انت بس اللى بتبالِغ فى تقديرك ليهُم !
و هتعرف إن فى ناس خسارتهُم مكسب ليك ، مُش خِسارة ، اعرِف قيمة نِفسك ، و حِب نِفسك اولاً ، متجيش على نِفسك ، و متستناش حد يتغير ، و متعشِمش نِفسك فى فُرصة ، اللى عاشرك عارِف طبعك ، و عارف ايه اللى بيضايقك ، وايه اللى مُمكن يخليه يخسرك !
احنا مُش آسفين ليكوا ، ولا آسفين لينا ، بالعكس ده احنا مُتشكرين ليكوا ، عشان الناس اللى زيكوا بتدينا دروس فالحياة متتنسيش ، كأن ربنا بينورلنا بصيرتنا بيكوا ، استوعبوا ان مُش كُل اللى حواليك بيحبوك ، ومعزتهُم عندك زى عندهُم ، اتوقعوا ان الوحش قبل الحلو ، ومتبالِغش في حُبك للِناس ، ماتبالغش في حبك للِناس♥عود نفسك اللي يروح منك إعتبره مجاش !!
حياتك هتبقى أحسن لما تتعود ” ما تشغلش بالك ”
ما تشغلش بالك مين مشي ومين متغير معاك ما تشغلش بالك إيه اتقال من وراك ولا بأراء الناس فيك وخليك عارف إن حياتك بيهم أو من غيرهم هتمشي فلما تفارق حد مش هتموت ولما يخذلك حد برضو مش هتموت الحياة كدا والذكي اللي يفهم إن الحياة مطبات ومش الشاطر اللي بيتفادى المطب لا دا الشاطر هو اللي يقع في المطب بس يعرف يتفادى المطب اللي بعده ..
إجمد كدا وما تخليش الحزن يسرق عمرك ..
هتبقى أحسن لما تتعود تخليك ف حالك
ومتشغلش بالك غير بنفسك
أحسن حاجة ممكن تعملها إنك تحافظ على مسافة كافيه بينك وبين الناس عشان تفضل تشوفهم حلوين ، لأن الناس من بعيد دايماً أحلى …
