______
بقلم د. لحظة حسن
_______
كلمة ست الدارجة عند العرب كلمة لها مقام كبير وعادة تطلق كلمة الست بالألف والام على إمرأة ذات شأن يعنى بتطلق فى مصر على الست أم كلثوم مثلا أو الست نبوية موسى فكلمة ست تفخيم هائل وتبجيل ٠
أزاى اكون ست ؟ لو سألت السؤال ده لأى أمرأة حتقولى ربنا خلقنى ست لكن مش ده قصدى لا انتى ربنا خلقك أنثى لكن ازاى الناس تلقبنى بالست فلانه
أولا لازم إحنا كستات اللى نبتدى بنفسنا لازم تحسى من جواكِ انك ست وهنومة بصوتك المنخفض بعبارتك المنمقة بمظهرك المرتب النظيف الأنيق المحتشم وبإبتسامتك الرقيقة
لازم ماتحوليش أبدا تحطى نفسك فى صف الرجال حتى ولو كنت فى صفوفهم فى العمل
ماتتصرفيش كالرجل أبدا مادام زوجك أو ابنك موجود ديما خليكي فى مكانك
الست اللى شالت البيت من الالف الى الياء قامت بمهامها ومهام زوجها بصراحة جبته لنفسها ولا تلوم الا نفسها
نشوف ديما اللى تقول لزوجها انا مابعرفش اتعامل ابدا مع صنايعى فى اى شئ
انا مابعرفش اغير انبوبه البوتاجاز
انا مابعرفش انزل اشيل احتاجات البيت لوحدى لازم تنزل معايا تساعدنى
انا مقدرش اروح للدكتور لوحدى لازم تكون معايا
الست دى كسبانة وحافظت على نفسها من المشقة وحفظت نفسها من التعامل مع فئة معينة من الناس صعب التعامل معاهم
ليه تشيلى البيت لوحدك لو جوزك معاكى فى البيت وبعد كده تشتكى إنك بقيتى شبه الراجل فى كل حاجة
اللى اشتغلت فى البيت سباك ونجار واحيانا نقاش صحيح وفرت فلوس لكن فقدت قصاد ده حاجه أغلى بكتير هى انوثتها وخصوصا امام زوجها اللى بيتفرج على الستات ويقول ياسلااااام على الرقة وبيتعامل معاها هى على إنها صاحبة متولى مثلا😂
اللى اتخانقت فى الشارع وهى سايقه عربيتها مع راجل وانتصرت عليه بالصوت العالى واحيانا بمد الايد انتى فقدتى احترام اللى حواليكى حتى ولو معاكى الحق ٠
اللى اتخانقت مع جارها وتطاولت عليه امام اهل بيته جيرانها مش حيقولوا براڤوا عليها ابدا بالعكس هى حطت زوجها فى موقف ومنظر لايحمد عليه وحيقولوا عليها أهلها قصروا فى تربيتها٠
انا شايفه ان اللى بتقول ديما انا ست ماقدرش اعمل كذا وكذا من شغل الرجل اللى بتقول جوزى يحل المشكله مع جارنا انا مش حتدخل بين الرجالة بصراحة فازت وحافظت على هدوءها النفسى
حافظت على نعومة ايدها وجمالها
حافظت على عمودها الفقرى وده الأهم
طبعا لو بتعملى مهام زوجك و مضطرة لده لغيابه عنك لك اجر كبير ولو بتعمليه تطوع تبقي اخدتى اكبر مقلب فى حياتك خليك ديما ( الست ) فلانة ٠
