بقلم الشاعرة :جهاد نوار
صورة ،و صورة من أيام
وقت زمان
صورة مامتى لما بنام
و الأحلام
و اما بنصحى على صوت
جدى بردو كمان
صورة لبابا عند الشاشة
واقف ويا أخويا و جدى
كله بشاشة
صورة تيتة لما بتحكى
ست الحسن،و ديعة بتبكى
و انا و اخواتى قاعدين نسمع
أحلى حكاية
و ف مدرستى، و يا زميلتى
نجرى، و نلعب مش بنهدى
لسة عيونا ،زى قلوبنا
بريئة ،جريئة فينا تحدى
و صورة كل ولاد العيلة
لما اتجمعنا فى هُليلة
يوم العيد ،جوة البيت
فرحة كبيرة جاية لعندى
و عمو حبيبى،ما هو صديقى
نسمع ثومة،و أعمل واجبى
واقف يضحك ويا عروسة
و انا وياهم بهديه بوسة
صورة،و صورة ،و حيطان ود
كام ألبوم يتعدوم عد
بس الأجمل صورة قلبى
و هو صغير لسة بيحبى
عاشق دنيا،ساعة،و ثانية
راسم فرحة بلون الورد
لما قابلته،لما قابلنى
كان لحياتى ربيع بيغنى
و صورة بعيدة،منى قريبة
يوم ما فراق كده شق القلب
قالوا ده إسمه إسمه الموت
يالا نودع مين بنحب
مرة الجارة،و عمى لوالدى
مرة حمادة،و قبله ده جدى
فجأة دى ماما،و بابا يا ربى
صورة فظيعة بتعلن غلبى
و الأصحاب،و الأحباب
كله ف صورة فيها حداد
ٱخر صورة مش بنشوفها
لونها حقيقى، و مش كداب
بيه بنودع أحلى مالينا
فى الدنيا دى تضيع أسامينا
و نرجع صورة مجرد ذكرى
و بعد سنين هتغيب ملامحنا
و يجى مكانا مليون صورة
جيل ورا جيل براويز مكسورة
لا اللى فاكرنا لسة فى صورة
و لا فيه صورة جوة حيطانا
